شفافية Transparency

عاشق العقل

Shafafeya — Thu, 26 Jan 2012 01:26:26 +0000

عاشق الحياة يجد عقله مشتتاً بين أحلام الصباح والليل، أحلام السماء والأرض، أحلام الجنة وجهنم، وهو ذاك العقل الذي يسعى التحرر من جسد صاحبه.

الهتافات الموحدة للمسيرات – إيقاع الحرية

Shafafeya — Wed, 25 Jan 2012 01:29:40 +0000

الهتافات الموحدة

إيقاع الحرية

ــــــــــــــــــــــــــــــــــــــــــ

قتلوا الشيخ قتلوا الدكتور،

بكرة ييجي عليكوا الدور.

إقتل خالد، إقتل مينا،

كل رصاصة بتقوينا.

أقتل غني إقتل فقير،

برده نازلين التحرير.

آدي مفهومهم للتغيير،

سجن صغير يبقى كبير.

وآدي مفهومهم للحرية،

الـسجـــون العسكرية.

مـــدنــــية مـــــدنــــــية،

مليون لا للعسكريـــة،

قلنا دولة مدنــــيـــة،

لا للدولة العسكرية

يسقط يسقط حكم العسكر

مصر دولة مش معسكر..

احنا الشعب الخط الاحمر

يسقط يسقط حكم العسكر

ـــــــــــــــــــــــــــــــــــــــــــــــ

—————

قوم يا مصري قول للجيش

فين الأمن وفين العيش

غلوا السكر غلوا الزيت

بكرة تبيعوا عفش البيت

فين أنابيب البوتاجاز

ولإسرائيل صدرتوا الغاز.

مجلس عسكر مجلس عار،

لا بنزين ولا حتى سولار.

عجلة إنتاج ذل وعار،

اللي تسكت الأحرار.

آه يا حكومة هز الوسط،

كيلو اللحمة بقى بالقسط

يا وزرا طفوا التكيف،

مش لاقيين حق الرغيف.

هما بياكلوا حمام وفراخ،

واحنا الفول دوخنا وداخ.

يسقط يسقط حكم العسكر

أيوة بنهتف ضد العسكر.

إحنا الشعب الخط الأحمر.

يسقط يسقط حكم العسكر.

_____________________

——————-

يا حرية فينِك فينِك؟

حكم العسكر بيننا وبينك.

يا عدالة فينِك فينِك؟

قضاء العسكر بيننا وبينك.

قلنا عيش عدالة حرية،

مش محاكمات عسكرية.

محاكمات عسكرية ليه؟

قتلنا ولادها ولا إيه؟

محاكمات عسكرية ليه؟

إحنا صهاينة ولا إيه؟

لأ يا مشير إنت الصهيوني

ومش هتشوف الخوف في عيوني.

إعتقلوني، إعتقلوني

ومش هاتشوف الخوف في عيوني.

يسقط يسقط حكم العسكر

أيوة بنهتف ضد العسكر

مصر دولة مش معسكر

يسقط يسقط حكم العسكر

ــــــــــــــــــــــــــــــــــــــ

————–

ياللي واقف، واقف ليه؟

أخدت حقك ولا إيه؟

ياللي خايف، خايف ليه؟

بعد بلدنا فاضل إيه؟

ياللي واقف عالرصيف،

قوللي بكام حق الرغيف.

يا أهالينا إنضموا لينا

الحرية ليكوا ولينا.

يا أهالينا إنضموا لينا.

الكرامة ليكوا ولينا.

ما تعبناش ما تعبناش.

الحرية مش ببلاش.

ما زهقناش ما زهقناش.

الكرامة مش ببلاش.

ثورة ثورة حتى النصر

إحنا شباب هانحرر مصر.

ثورة ثورة حتى النصر

ثورة في كل شوارع مصر

ثورة في كل مدارس مصر

ثورة في كل مصانع مصر،

ثورة في كل جوامع مصر

ثورة في كل كنائس مصر.

جوة كنيسة وجوة الأزهر

يسقط يسقط حكم العسكر،

إحنا الشعب الخط الأحمر.

يسقط يسقط حكم العسكر.

ــــــــــــــــــــــــــــــــــــــــــــــ

—————-

سامع أم شهيد بتنادي

مجلس عسكر قتلوا ولادي

سامع أم شهيد بتقول،

العسكر هو المسؤول.

مجلس عسكر يا خسيس

دم الشهداء مش رخيص

مجلس عسكر من حثالة،

رموا الشهداء في الزبالة.

الشهيد قاللها خلاص،

إفتح صدرك للرصاص،

يا شهيد نام وإرتاح،

واحنا نكمل الكفاح.

هما يقولوا احتفالات،

بعد ما أخوك وأخويا مات.

الخروج الآمن… لأ!

دم الشهداء علينا حق.

يسقط يسقط حكم العسكر،

أيوة بنهتف ضد العسكر.

دم الشهداء الخط الأحمر.

يسقط يسقط حكم العسكر.

ــــــــــــــــــــــــــــــــــــــــــ

—————

أنا مش جبان أنا مش جبان،

الشعب المصري لا يُهان.

دب برجلك طلَّع نار،

بيننا وبينهم دم وطار.

هما معاهم ضرب النار،

وإحنا معانا الجَبَّار.

ولا بنخاف ولا بنطاطي،

إحنا كرهنا الصوت الواطي.

ولا بنخاف ولا بنطاطي،

إحنا أخدنا على المطاطي.

قوللي يا مصري إيه أفكارك

الطنطاوي هو مبارك

واللي يحمي حسني مبارك،

عمره ما يحمي داري ودارك.

يسقط يسقط حكم مبارك

يسقط يسقط كل مبارك.

إحنا الشعب الخط الأحمر،

يسقط يسقط حكم العسكر.

“No Longer Do I Dream”

Shafafeya — Fri, 02 Dec 2011 03:00:23 +0000

معركة باب اللوق - ٢٢ نوفمبر ٢٠١١

I used to write.
Times when I could care.
Times when we would share
Our thoughts with the night.

I used to to speak.
Times when no one dared.
Times when all were scared.
And now I am weak.

I used to think.
Thoughts I once could spare
Of a world I thought was fair.
Perceptions carved in ink.

I used to dream.
Times when I could rest
And lift the world off my chest.
No longer do I dream…
No longer do I dream.

بداية عقيمة بعد نهاية عظيمة

Shafafeya — Mon, 24 Oct 2011 18:03:07 +0000

البداية

رجعنا للبداية بعد النهاية.

بداية عقيمة بعد نهاية عظيمة،

وغير أي قصة مش عارفين نفرق البداية عن النهاية.

أحييك على آداءك يا رفيقي في البطولة،

على أولوياتك ومواقفك يا مثل للرجولة.

أحييك عالمشوار اللي كملته من غير زهق،

وعالنجاح اللي حققته من غير خذل.

أحييك أحييك وبروحي وبدمي أفديك،

وحتى أحلامي الغبية أضحي بيها ليك.

اتضحك عليك زمان واتقاللك ان العلم النور.

لهاك بكلمتين وقاللك اقرأ بين السطور.

اتضحك عليك واتقاللك ان الصبر مفتاح الفرج.

لما اتقاللك ان الحياة مرح والحياة هرج.

اخرس واحترس…

ما تنساش انك بتحاول تكافح عدو شرس،

عدوك اللي اتعلم من أخطاء أسياده،

ومش هيسيبك لحد ما انت وأصحابك ترجعوا عباده.

وهاتندم…

والله العظيم هاتندم.

هاتندم على كل كلمة وكل قرار.

هاتندم علشان ترجع وتدمن الاستقرار.

هاتندم علشان تنسى احساسك بالانتصار.

هاتندم علشان تحرم تحط ايدك في النار.

هاتندم علشان تنسى ان كان ليك بداية.

النهاية

برج المراقبة

Shafafeya — Sat, 08 Oct 2011 10:01:46 +0000

"ما تصورش يا أستاذ"

اتذكر يوم ١١ فبراير، بعد احتفالنا بتخلي حسني مبارك عن منصب رئيس الجمهورية…

عدت الى منزلي مبكرا مع بعض الاصدقاء على نحو الساعة التاسعة مساءً، لكي أعطي نفسي فرصة لاستيعاب ما قد حدث منذ ساعات قليلة… شعرت براحة غريبة، شعرت بأن رمز الاستبداد والقهر الذي كان يتبعني ويتبع كل خطوات أبي وأمي لسنوات طويلة أخيرا قد سقط…

عاد أخي الى المنزل بعدي بقليل، وقبل أن ينطق بالسلام صاح بجملة واحدة وكررها مرة بعد مرة: “أخيراً ما باقيناش متراقبين! أخيرا مافيش حد بيراقبنا!”

صدقته واحتفلت معه وهتفنا: “خلاص خلاص خلاص… مافيش مراقبة خلاص!”

إستمر هذا الشعور بالأمان طوال شهر فبراير، عندما تم حل جهاز أمن الدولة ووعد العيسوي بأن وزارة الداخلية لن تقوم بمراقبة أي شخص الا بإذن من النيابة…

وبالطبع… كنت مخطئاً…

يوم ٣ و٤ أكتوبر كنت متواجداً أمام النيابة العسكرية بالحي العاشر، أول يوم للتضامن مع معتقلي السفارة وثاني يوم للتضامن مع معتقلي ٣٠ سبتمبر ومايكل نبيل. لاحظت بأن هناك عدد من المجندين من القوات المسلحة متواجدين داخل هذا البرج ويقومون بتصويرنا، أحد المجندين معه كاميرة فوتوغرافية والآخر معه كاميرة فيديو.

تذكرت يوم إقتحام مقر أمن الدولة بمدينة نصر…. تذكرت تعليمات القوات المسلحة بتسليم أي مستندات تم العثور عليها الى الجيش “لكي يتم تسليمها لمكتب النائب العام ويتم التحقيق فيها”… ثم تذكرت سؤالي بعد هذا اليوم بأسبوع: أين ملفاتنا؟ لماذا لم يتم اصدار قرار فوري بالتحقيق ثم التخلص من جميع ملفات “النشطاء والسياسيين” التي تم تكوينها بطرق غير شرعية وغير قانونية؟ تسلمت لفكرة أن المجلس العسكري كان متواطئاً مع جهاز أمن الدولة لكي يستفيد هو من جميع المستندات والمعلومات الذي جمعها هذا الجهاز عبر سنوات طويلة… من الواضح أن ملفات أمن الدولة للنشطاء والسياسيين والاعلاميين سيتم استخدامها مرة أخرى لصالح الحاكم العسكري المستبد.

من أبرز ذكرياتي لمراقبة الهواتف بعد تنحي مبارك كانت أثناء عيد الفطر، عندما كنت أشارك في تنظيم حملة زيارات السجون للتضامن مع ضحايا المحاكمات العسكرية. لم أعلن بشكل رسمي/علني بأنني كنت أنتوي على زيارة سجن الوادي الجديد، ولكن فوجئت بمكالمة من أحد عائلات السجناء قبل زيارتي بيومين وأبلغوني بأن هناك تحركات غريبة داخل السجن وترميمات لبعض المرافق وزيادة عدد الساعات لدخول المياه الى العنابر، الخ… وكل هذا بسبب خبر في السجن بأن “أيمن نور وحرمه سيقومون بزيارة سجن الوادي مع لجنة حقوق انسان”.

من الواضح أن الجهة التي كانت تقوم بمراقبة مكالماتي فشلت في تصعيد المعلومات على نحو صحيح، ولكن تأكدنا بأن المراقبة مازالت تمارس على الجميع، حتى على النشطاء الأقل أهمية مثلي.

ولكن الاختلاف الوحيد قبل وبعد الثورة هو أن الداخلية هي التي كانت تقوم بمراقبة النشطاء قبل الثورة، ولكن الآن اصبحت المؤسسة العسكرية شريك مع الداخلية في مراقبة التيليفونات وتصوير النشطاء وإختراق المظاهرات والاعتصامات بعد ~~“أعظم ثورة في تاريخ البشرية”~~.

يسقط كل جبان يعتمد على الاعتداء على الخصوصية لكي يحقق أغراضه ويثبت قوته.

AUC Strikes 11/09 أضرابات بالجامعة الأمريكية

Shafafeya — Mon, 12 Sep 2011 02:49:50 +0000

قام إتحاد الطلبة بالجامعة الأمريكية بتنظيم إضراب بالتنسيق مع رجال الأمن وعدد من العاملين بالجامعة يوم الأحد ١١ سبتمبر، وهذا اعتراضاً على العديد من التجاوزات التعسفية التي تمارسها إدارة الجامعة الأمريكية مع كلا الطلاب والموظفين.

معظم مطالب الطلبة كانت متعلقة المصاريف الجامعية: وضع صقف لها وإلغاء ال٩٪ زيادة سنوية على المصاريف، وطالبوا أيضاً بالشفافية المطلقة بخصوص جميع الشؤون المالية للجامعة، مع بعض الحقوق الأخرى المتعلقة بخدمات الجامعة وحقوق الدارسين بها.

وقرر عدد من أفراد أمن الجامعة بالإعتصام على الحرم الجامعي وقد انضم اليهم عدد من طلاب الجامعة الأمريكية في الإعتصام للتضامن معهم لتحقيق مطالبهم…

وأتى هذا القرار بالإعتصام كوسيلة للتصعيد بعد شهور طويلة من التجاهل والوعود الفارغة والتهديدات بالفصل التعسفي من قبل إدارة الجامعة الأمريكية وبعد أن قاموا عدة مرات بتسليم للإدارة مطالبهم المشروعة التي تضمن لهم حياة كريمة مقابل العمل الذي يقومون به، والمطالب كالآتي:

مطالب الأمن:

رفع الحد الأدني لمرتب موظفي الأمن الى ٢،٠٠٠ج (المستوى الرابع)
عودة الساعة الإضافي “بدل راحة”
إعطاء موظف الأمن بدل مخاطر
عودة مواعيد العمل الى ما كانت عليه قبل التعديلات الجديدة في جداول العمل
تعيين (نثبيت عقود) جميع الأفراد “اليومية”

وقد ذكر العديد من رجال الأمن إستياءهم عن مديرهم الجديد الذي تولى منصبه منذ شهور قليلة برغم عدم خبرته في مجال الأمن، وبأن هذا المدير (د. محمود الزق) تراجع عن جميع الوعود التي صدرت من إدارة الجامعة قبل توليه منصبه شهر يوليو الماضي، ولذلك هتفوا أثناء المظاهرة برحيل د. محمود الزق.

مطالب العاملين بقسم الزراعة DDC

حد أدنى للمرتبات ٢٠٠٠ ج + ٢٠٠ ج بدل وجبة
أجازة يومي الجمعة والسبت
إحتساب الوقت الأضافي
تغيير الأوتوبيس
تغيير الزي

——

يرجى نشر هذه التفاصيل وتوجيه الاهتمام الإعلامي الى هذا الاعتصام لمنع أتخاذ اي اجراء تعسفي من قبل إدارة الجامعة الأمريكية، كما فعلت من قبل.

ممثل الطلبة(يمين) ، ممثل عمال الزراعة (وسط) ، وممثل الأمن (يسار) ـ

Maikel – مايكل

Shafafeya — Thu, 01 Sep 2011 11:00:41 +0000

قضية مايكل نبيل أبسط اختبار لمبادئك كمواطن يرغب في تحقيق الحرية.

ان كنت صادق لمبادئك وتؤمن بأنها لا تتجزأ، يجب ان تدافع عن مايكل…

#FreeMaikel

Video produced by R.R and O.K – #NoMilTrials Group

كان نفسي أقول عيد سعيد

Shafafeya — Tue, 30 Aug 2011 09:32:04 +0000

كان نفسي أقول عيد سعيد

كان نفسي أغني وأقول “العيد فرحة وأجمل فرحة”… وللأسف مش قادر.

مضيت ٤ سنوات من عمري والأعياد كلها كانت في السجون، وكان طقس عائلي بسيط وجميل: يوم العيد كنا بنصحى الصبح بدري ونتجه الى طرة…. بنوصل طرة وبنركب الطفطف أو عربية الترحيلات (اللي بتوصلنا من المدخل الرئيسي الى مدخل سجن والدي). نخش الزيارة، نخرج من الزيارة، نستنى الطفطف، ونروَّح… من غير والدي. لو حالفنا الحظ كنا بِنِدخُلٌه بأكل وبنخرج بمقالة متهربة داخل قلم صغير.

إحنا كنا عارفين من البداية أن الموضوع هيوصل لكدة… كنا مستعدين لفكرة السجون وكنا عارفين أن ده هو ثمن النضال، ثمن مواجهة مبارك ونجل مبارك ونظام مبارك. تذوقنا طعم الظلم لسنوات طويلة ولكننا كنا مهيئين لهذه المواجهة.

الحمد لله أنا النهاردة باعيِّد مع والدي في البيت. صلينا صلاة العيد في التحرير مع بعض وفطرنا أول فطار صباحي بعد رمضان مع بعض، باعيِّد لأول مرة في حياتي بدون مبارك، في مصر “بعد قيام ثورة”. وبرغم من ذلك، مش عارف أحتفل… ما قولتش لحد “عيد سعيد” علشان لو قلت كده هابقى منافق، وكل اللي في بالي انه ده عيد أليم، عيد حزين.

بعد “أعظم ثورة في تاريخ العالم” بسبع شهور أكتر من ١١،٠٠٠ عائلة هيعيِّدوا لأول مرة من غير ولادهم/أخواتهم/أزواجهم/آبائهم، علشان المجلس الأعلى للقوات المسلحة استخسر فيهم محاكمات مدنية عادلة بعد أن قامت الثورة بغرض تحقيق العدالة… وبرغم من ذلك، المخلوع الذي إغتصب مصر سنوات طويلة يحاكم محاكمة مدنية عادلة.

أغلبية المدنيين اللي اتحاكموا عسكرياً ناس بسيطة، مالهومش ظهر أو واسطة أو صوت يوصلهم للإعلام، أو أصدقاء نشطاء على الفيسبوك والتويتر يعملولهم حملة إليكترونية. ولا هما ولا أهاليهم كان ليهم في السياسة ولا مظاهرات، ولا كان ليهم في السجون أو متعودين أو حتى متوقعين البهدلة دي. دلوقتي الأهالي بيستِلْفْوا فلوس علشان يجهزوا للزيارة الجاية بتاعت حبايبهم في السجن ويجهزوا نفسيهم لبهدلة السفر علشان يوصلوا السجون البعيدة.

مش هاكلمكم عن احساسهم بالظلم لأن ده شئ بديهي، ولو عايز تحس بيهم أكتر تتفرج على شهادتهم هنا:

http://www.youtube.com/tahrirdiaries

هاكلمكم عن شعورهم بخيبة الأمل… لما يقعدوا شهر بالكامل بيتقاللهم ان عيالهم هيخرجوا على العيد، بعد ما كافحوا شهور طويلة في الشوارع والمصالح الحكومية والعسكرية علشان ياخدوا حق حبيابهم اللي في السجن، وبعدين يطلع المشير يفرج عن مجموعة صغيرة جدا ويظهرهم على ان “دول هما المظلومين، والباقي بلطجية ولاد ستين في سبعين”… عايزكم تتخيلوا شعورهم بخيبة الأمل في نفسيهم وفي النشطاء والمحاميين اللي بقالهم شهور بيحاولوا يساعدوهم وفي الإعلام اللي مرة واحدة ضميره صحي… إحساسهم بالفشل… إن بعد العذاب اللي شافوه برة واللي عيالهم شافوه جوة السجن، إن بعد كل ده يفشلوا…

هل إحنا، كنشطاء بنتلقى درس من المجلس العسكري إن مهما عملنا ومهما ضغطنا جهودنا لصالح هؤلاء الضحايا عمرها ما هاتيجي بفايدة؟ هل بنتلقى هذا الدرس على حساب الأهالي وأبنائهم/أخواتهم/أزواجهم/آبائهم؟ هل بنتعاقب علشان بنعمل اللي علينا كمصريين خايفين على بلدهم؟ علشان بنرفض الظلم علناً ولا نخشى فضح وإحراج أي ظالم مستبد؟

١١ ألف عائلة هيعيدوا مع عيالهم في السجن لأول مرة أو هيستنوا لبعد العيد بسبب ظروفهم المادية.

وقد إكتشفنا مجدداً أن العدالة في مصر للأقوياء فقط، للأثرياء فقط، للمشاهير فقط…. أما العدالة المدعمة (بالمضمون الغذائي) مخصصة للفقراء وللبسطاء، وهي العدالة الملوثة المتوفرة في القضاء العسكري الظالم.

وبرغم من كل هذا لازلت متفائلاً، ولذلك أطلب منكم الدعاء لأهالي ضحايا المحاكمات العسكرية الذين يمضون حاليا عيداً تعيساً ولأول مرة بدون حبائبهم.

“من ذاق الظلم لا يظلم أبدا”

العميد الذي هددني بالاعتقال واتهمني بالعمالة

Shafafeya — Sat, 06 Aug 2011 12:26:27 +0000

يوم ٥ أغسطس ٢٠١١

بعد فض الإفطار الجماعي السلمي بالتحرير بالقوة القصوة، بقيت في الميدان مع عدد قليل من النشطاء، مما أدى الى بعض النقاشات الحادة مع عدد من قيادات الجيش وحتى الشرطة (مباحث) الذين تبقوا في الميدان أو عادوا اليه بعد ان طاردوا المشاركين في الأفطار بعيداً عن التحرير… ـ

صديقٌ لي كان يتناقش مع مجموعة من أفراد القوات المسلحة، على رأسهم العميد مجدي (صورته أعلاه)… وبعد مرور بضعة دقائق قررت ان هذا النقاش لن يأتي بنتيجة مثمرة، وهذا الرأي تكون بناءً على الأسلوب الهمجي المتوحش الذي تم فض الإفطار به حيث أنهم لم يميزوا بين رجل او امرأة او حتى بين الكبير والطفل… ـ

ذهبت الى صديقي وقلت يصوتٍ عالٍ: “اللي يضرب حريم بعصيان وشوم، مش هاتعرف تقنعه بحاجة” وقررت هذه الجملة عدة مرات… ـ (ويا ريت تسامحوني على استخدام لفظ “الحريم” ) ـ

غضب العميد مجدي وأمسك بي من ياقتي وقال: “انت بالذات هاقبض عليك… والله العظيم هاقبض عليك! وانا عارفك. انت قابض… انت بالذات قابض.” ـ

فأجبته قائلاً: “انا اللي قابض، صح؟ انا اللي قابض؟” ـ

الحمد لله وبفضل اصدقائي وزملائي من النشطاء الذين حضروا هذا الموقف لم يستطع العميد القبض علي. ـ

شاهدوا هذه اللقطات لبعض الناشطات اللاتي تعرضن للإعتداءات من قبل أفراد القوات المسلحة والداخلية اثناء وبعد فض هذا الإفطار السلمي. ـ

أنا فعلاً آسف

Shafafeya — Sun, 24 Jul 2011 23:24:13 +0000

أنا آسف

انا آسف انني حسيت، ولو للحظة، ان احنا انتصرنا بعد يوم ١١ فبراير

انا آسف انني قلت لأصحابي “خلاص كفاية تحرير، يلا نروح” بعد ما مشِّينا احمد شفيق

انا آسف انني، ولو للحظة، حسيت ان احنا خلاص تجاوزنا اي خطر لإجهاض الثورة وإن إحنا خلاص ممكن نتوقع من العسكر ان ينفذ باقي مطالبنا

انا آسف على انني، ولو للحظة، حسيت ان العسكر لن يمثل خطر على الثورة بعد تنحي مبارك وأنه سوف يخضع لإرادة الثورة والشعب. ـ

انا آسف على اليوم اللي قلت فيه لأي حد “اصبروا كام اسبوع وهانشوفوا ايه اللي هيحصل…” ـ

انا آسف على اليوم اللي اكتفيت فيه ب”ان شاء الله” ولم أضيف “ان شاء الشعب”

أنا آسف على اليوم اللي إقتنعت فيه بإن “شباب الثورة” هما اللي هيحكموا مصر… هما اللي هيوجهوا مصر… ان الأجيال السابقة لنا هاتقدرنا على مجهودنا
وهايشكرونا على تعبنا

انا آسف على انني ماجيبتش حق الشهيد بنفسي، وما جيبتش حق المظلوم بنفسي، واعتمدت، ولو ليوم، على انصاف الرجال في السلطة لتحقيق هذه الأغراض/مطالب

انا آسف انني ما اتصابتش اكتر… انني ما اتقبضش عليا اكتر…. انني ما اتعذبتش زي ما أصدقائي اتعذبوا وانني ما أعتقلتش زي ما هما أعتقلوا… ـ

انا فعلاً آسف يا مصر